السلام عليكم، أهلا بكم في الدرس الثالث من سلسة تعليم التصوير الفوتوغرافي المجانية 🙂
قبل ما نشرح الفلاتر واستخداماتها ياريت تراجعوا الدروس اللي فاتت من هنا .
النهاردة هنتكلم شوية عن الفلاتر واستخداماتها بصورة مفصلة شويتين وأظن إن الدرس هيفيد المبتدئين واللى بيصوروا بقالهم فترة كمان إن شاء الله
أول حاجة إية هى الفلاتر ؟
هى اجزاء بتركب فوق العدسة عشان تزود من امكانياتها او تعمل وظيفة معينة هنشرحها في اللي جاي
الفلاتر بتتصنع من إية ؟
دى المواد اللى بيتصنع منها الفلاتر بالترتيب من الأجود للأقل جودة :
- الزجاج (Glass) الأغلى والأضعف والمعرض للكسر اكثر من غيره لكن الأجود برده
- الراتنج (Resin) مادة صمغية بتطلع من الشجر وبتتعالج بعد كدة
- البوليمر (Polymer) نوع من أنواع البلاستيك الشفاف المعالج
- الجيلاتين (Gelatin)بطلوا يستخدموه خلاص ونادر لما بنلاقيه فى أى فلتر
- النايلون (Nylon) مينفعش يبقى لوحده لكنه ممكن يبقى طبقى بين طبقتين زجاج مثلا أو راتنج
UV أولا فلتر الحماية
وهو أشهر فلتر بين كل الفلاتر وغالبا كل محلات الكاميرات بتبيع الكاميرات معاها هدية الفلتر ده .. عشان نوضح الصورة الفلتر اسمه UV Ultraviolet rays يعنى فلتر الأشعة فوق البنفسجية وده كان موجود زمان عشان الكاميرات الفيلم كانت بتحس بالاشعة دى وبتأثر على الجودة بشكل كبير .. ولكن لحسن أغلب سينسورات الكاميرا بتبقي عليها فلتر لل UV وبالتالى أصبحت الفلاتر دي بتستخدم للحماية فقط .. ولكن طبعا بما إننا زودنا طبقة زجاج على العدسة فده بيقلل جودة الصورة فبالتالى خد قرارك لو عدستك غالية هاتلها فلتر يحميها ويحافظ عليها لان تكلفة الفلتر هتبقى اقل من تكلفة تصليح العدسة .. ولو عدستك رخيصة وده مش موجود دلوقتى مالوش لازمة الفلتر
Polarizer ثانيا فلتر البولورايزر
الفلتر ده وظيفته إنه يزود تشبع الألوان ويقلل الانعكاسات الغير مرغوبة فى الصور ..بيستخدم فى أغلب أنواع التصوير لكن اللاند سكيب أكتر
أمثلة علي استخدام الفلتر
Neutral Density “ND” ثالثا : فلتر ال
الفلتر ده فى منه أكتر من نوع لكن وظيفتهم متقاربة وهى انهم بيقللوا الضوء اللى داخل للكاميرا يعنى زى ما النظارة الشمس بتعمل فى العين بالظبط والهدف من استخدامه بيبقي تزويد زمن التعريض و استخدام سرعة غالق أبطئ لعمل تأثيرات علي الصورة
فى نوع بيبقى كله لون واحد وده بيبقى لون واحد ودة نموذج من تأثيره
GND Filter وفى نوع متدرج من الشفاف تماما للون الغامق
” بيبقى مربع ” وده بيدى تأثير درامى للصورة يعنى بيظبط ضوء السما والأرض مع بعض عن طريق انه يغمق السما
وادى نموذج من تأثير الفلتر
وده شرح للفلتر بيعمل اية بالظبط فى كل جزء
Close Up Filters رابعا فلاتر الكلوس اب ” الماكرو “
الفلتر ده بيشتغل كعدسة مكبرة وبالتالى بيخلينا نقدر نعمل فوكس ( تابعونا لمعرفة المزيد عن الفوكس ) على الأجسام الصغيرة من مسافة أقرب وده اللى بيخلينا نصور صورة مكبرة
والفلاتر دى بتستخدم فى تصوير الماكرو ( درس الماكرو هيتنشر قريب باذن الله )
Colorized Filters خامسا الفلاتر الملونة
والنوع ده من الفلاتر مبقاش مستخدم أوى زى زمان عشان كان بيستخدم فى تصوير الأبيض والأسود
فكرة الفلتر انه بيلغى لون كامل من الصورة فبيدى كونتراست عالى فى الصورة ودى بتدى نتايج كويسة فى التصوير الأحادى Monocromes
Soft Focus Filters سادسا :فلاتر السوفت فوكس
الفلاتر دى وظيفتها عمل سوفت فوكس يعنى بتقلل الشاربنس بتاع العدسة وده بيبقى مطلوب لعمل تأثيرات فنية فى بعض الأوقات خصوصا فى تصوير الأشخاص
الصورة دى بتوضح تأثير الفلتر
Special Effects Filters سابعا فلاتر التأثيرات الخاصة
ودى فلاتر بتستخدم عشان تعمل بيها تأثيرات خاصة ..فى فلاتر بتحول إضاءات الخلفية المعزولة لأشكال هندسية وهكذا <<
وفلاتر تانية بتستخدم لتصوير المجوهرات عشان تعمل زى اللينس فلاير فيها وإيفيكتات تانية كتير
وفى فلاتر بتغير توازن اللون الأبيض ..لكن الفلاتر اللى فوق دى أكثر الأنواع انتشارا
وده نموذج من فلاتر التأثيرات
عشان تشترى فلتر لازم تبقى عارف هتستخدمه على عدسة إية عشان الفلتر بيتباع بالمقاس
لكن لو عايز تستخدم نفس الفلتر على أكتر من عدسة تعمل إيه ؟
بسيطة فى حاجة اسمها
Step up & Step Down mounts
ودول بيركبوا على العدسة عشان يخليها تاخد المقاس الأكبر أو الأصغر من الفلتر .لكن نصيحة خليك فى الستب أب افضل لإن كل ما كان الفلتر أكبر من العدسة أو قدها كل ما كانت النتائج أفضل
وده شكلهم
أخر حاجة أشهر ماركات الفلاتر
- Lee
- B&W
- Hoya
- Tiffen
- Cokin
- Singh-Ray
- phottix
- opteka
لو عجبك الدرس إعمل شير وخلى غيرك ينتفع بيه واشترك في الموقع ليصلك كل جديد 🙂
المصادر والمراجع
cambridgeincolour.com
photographylife.com/
picturecorrect.com
exposureguide.com
camerafilters.com/
www.dpfwiw.com
