fbpx

Metering أساسيات التصوير : 5 مقياس الضوء

 

سلام عليكم ..أهلا بيكم جميعا  درس النهاردة عن قياس الضوء فى سلسلة دروس التصوير الفوتوغرافى للمبتدئين ..

السلسلة اللى بحاول فيها أقدم المعرفة السهلة لأى حد بيفكر يتعلم التصوير الفوتوغرافى ..قبل ما تبدء قراءة لازم ترجع تشوف الدروس اللى فاتت  من هنا

كيف تتم الرؤية

أول حاجة لازم تعرفوا إننا بنشوف لما الضوء بيقع على الاجسام  اللى حوالينا وبينعكس منها والضوء المنعكس ده بيجى على عينينا وبالتالى بنشوف …ولإن كل لون بيعكس كمية معينة من الضوء فبالتالى بنشوف التفاصيل …دى نفس النظرية اللى الكاميرا بتشوف بيها لما بتيجى تصور حاجة فى إضاءة بتقع عليها وتنعكس منها تدخل فى العدسة واللى بتنقلها للسينسور اللى بيسجل الصورة وبكدة تكون حضرتك صورت 🙂

يعنى ببساطة من غير ضوء مفيش تصوير .. 




 

طيب أنا دلوقتى معايا الكاميرا وعايز أصور صورة وعندى ظروف إضاءة متغيرة على حسب وقت التصوير والمكان كمان …إية الحل ؟

زمان كان فى قاعدة Sunny 16 بتستخدم عشان تعرف الإعدادات المناسبة للتصوير قبل ما تصور القاعدة دى كان بيستخدمها المصورين عشان يضمن إنه ميبوظش صور كتير وهى بتقول ببساطة إنك لو بتصور فى يوم مشمس وخليت فتحة العدسة 16 يبقى الشاتر سبيد بتاعك = 1 على الأيزو اللى هتستخدمه وطبعا كل وقت وليه تطبيقاته لمزيد من التفاصيل شوف درس القاعدة  من هنا 

.مع تطور التصوير وانتشار التصوير لكل الناس إبتدى الموضوع يبقى مرهق خصوصا إنى مش معقول هدى مبتدئ جدول فيه الإعدادات اللى يستخدمها فى كل وقت ..وهنا ظهرت الحاجة لجهاز يعمل الوظيف دى بدالنا وتم إختراع اللايت ميتير Light Meter وده شكله ( الصورة الأولى الجهاز البدائى لقياس الضوء والصورة الثانية أحد الأجهزة المستخدمة حالياً 

ولكن الأجهزة دى كانت مشكلتها حاجة واحدة ،إنها بتقيس الضوء الساقط على الحاجة اللى بنصورها ..مش الضوء المنعكس منها ..ولإن كل جسم بيعكس كمية معينة من الضوء وكل لون بيعكس كمية معينة فكانت عندنا المشكلة اننا لو بنصور شخص أسمر وشخص أبيض فى نفس المكان مش هنقدر نظبط التعريض على الاتنين لإن جهاز القياس ده كان بيدينا ترشيحاته لإعدادات الكاميرا بالنسبة للضوء الساقط عليهم ولكن الأسمر بيعكس ضوء أقل من الأبيض ؟ وهنا ظهرت المشكلة واللى كان المصور بيتغلب عليها بخبرته عن طريق إنه يعلى الاكسبوشر شوية وكدة ..ومع مرور الوقت وتطور التكنولوجيا ظهرت أجهزة اللايت ميتر اللى بتقيس الإضاءة المنعكسة من الأجسام اللى بنصورها واللى منها الاكسبوشر ميتير اللى موجود فى الكاميرا بتاعتنا ودى صورة المؤشر بتاعه ومكانه فى الكاميرا  

يبقى كدة عرفنا قياس الضوء بيتم إزاى وعرفنا إية هو الاكسبوشر ميتير .. دلوقتى عندنا الكادر اللى هنصوره و الجزء الجاى ببساطة يتلخص فى الجملة دى

( عايز الاكسبوشر ميتير يقيسلك أنهى جزء من الصورة ويقولك على الإعدادات المناسبة ليها ؟ ) فلو بتصور شخص فى خلفية منورة أوى وعايز تعرف الإعدادات المناسبة لوشة هتقيس الإضاءة على وشه لو بتصور منظر طبيعى هتحتاج تقيس إضاءة كل الاجزاء اللى فى الصورة  وهكذا وعشان كدة ظهرت أوضاع الميتريتج الموجودة فى الكاميرات بتاعتنا دلوقتى تعالوا نتعرف عليهم  مع بعض

تقدر تجيب أوضاع الميترينج المختلفة من نفس القايمة اللى بتغير منها الإعدادات زى الصورة 

النوع الأول : وضع Spot metering

الوضع ده الكاميرا بتقيس فيه الضوء فى نقطة معينة من الكادر اللى انت بتصوره  النقطة اللى انت بتحددها واللى أغلب الوقت بتكون نقطة الفوكس إلا لو كاميرتك بتقيس من نقطة السنتر  ..فلو إنت بتصور بورترية يفرق معاك وش الشخص أكتر حاجة وبالتالى هتختار الميترينج مود ده وهتبدء تصور بيه . ( راجع كاتالوج كاميرتك لإن فى كاميرات بتاخد السبوت من نقطة منتصف الكادر مش من نقطة الفوكس ).. فى الصورة اللى تحت دى الطائر جسمه مظبوط تماما فى حين  إن الخلفية فيها مناطق مضلمة فلو كنت اخترت الميترينج أى نوع تانى مكانش هيعرف يطلع الطائر مظبوط كدة .

النوع الثانى : Partial Metering 

وفى النوع ده الكاميرا بتقيس الضوء فى جزء صغير من الكادر وبتديلك الترشيحات بتاعتها بناء عليه ..تقدر تقول هو زى ال Spot بس بيقيس على مساحة أكبر شوية  ١٠٪ – ١٥٪  من الكادر وده مناسب لو هتصور حاجة كبيرة شوية ويهمك فيها التفاصيل كلها تظهر إضائتها مظبوطة إلى حد ما  ..صورة النسر التالى بما إنى مقرب من وشة فوشة واخد المساحة أكبر من الكادر كان لازم إنى أختار المود ده عشان أظهر إضاءه وشه اكتر وأكتر  

النوع الثالث  :Center-weighted average metering

فى الوضع ده الكاميرا بتقيس الضوء فى الجزء الاكبر من الكادر ٦٠٪- ٨٠٪ وبتاخد متوسط المناطق المضيئة والمظلمة فى الكادر من منطقة منتصف الكادر وحتى أطراف الكادر وعشان كد ة الوضع ده بيبقى مناسب أكتر فى تصوير الطبيعة والمناظر الطبيعية اللى بتكون فيها ظروف الإضاءة متساوية فى الكادر كله إلى حد كبير ..لإنك بتبقى مهتم تظهر تفاصيل أكتر المشاهد اللى فى الصورة بتاعتك  فالمود ده بيبقى الأفضل ..فى الصورة اللى تحت كنت عايز أخد أكبر تفاصيل من الأعشاب والسما فى نفس الوقت وعشان كدة إخترت مود السنتر ويتد ميترينج وده اللى إدانى ترشيح للاعدادات اللى ظهرت الصورة بالمنظر ده 

النوع الرابع : ال Evaluative – Matrix  

معروف كمان باسم ال Multi-zone metering بنقول عليه المود الأوتاميتيكى للميتريج وده الوضع الافتراضى للكاميرا لما بتجيبها أول من قدمه كانت شركة نيكون تحت اسم Automatic Multi-Pattern metering ما علينا من الكلام الكتير ده المود ده بيقيس الضوء من مناطق مختلفة من الكادر عشان يديلك الإعدادات اللى يشوفها مناسبة ( عدد مناطق القياس دى بتختلف من كاميرا لكاميرا ) وفى كاميرات بتديلك الإمكانية إنك تغير المناطق دى أو تتحكم تستخدم كام منطقة منهم وهكذا ..مناسب لو هتطلع تصوير ومش عارف ظروف الإضاءة ومعندكش وقت تغير أوضاع الميترينج كل شوية ..تقدر تقول كدة بيجهزك للمفاجآت . زى اللى فى الصورة دى 🙂

 

 

 

( ملحوظة أولانية  الكلام ده إمكانيات كاميرات فياريت تراجع كاتالوج كاميراتك وتعرف المعلومة الدقيقة اللى بتنطبق عليها فى النسب اللى هنوضح فيها كدة وكمان في كاميرات بتسمحلك تغير نسبة المساحة اللي هتعمل منها ميترينج

..

( ملحوظة تانية : الميترينج ما هو إلا قياس للضوء اللى فى الصورة واللى بناء عليه الكاميرا بتديلك ترشيحاتها من خلال المؤشر اللى قلنا عليه فوق ده ..يعنى لو حضرتك على المانويال مود و مغيرتش إعدادات الكاميرا بتاعتك وفضلت تغير فى الميترينج مفيش أى حاجة هتتغير فى الصورة )

..

( ملحوظة 3 : الكاميرا بتقيس الضوء على الدرجات المتوسطة من الألوان واللى بتبقى إفتراضياً فى أغلب الكاميرات 18٪ من اللون نفسه يعنى لما تيجى تصور الكاميرا بتدور على درجة متوسطة من الأحمر 18٪ مثلا أو 18٪ أزرق أو 18٪ أخضر أو 18٪ رمادى عشان تظبط التعريض عليه ) 

فى النهاية, دى صور تجميعية للموضوع   

الشكل ده هيوضح عمل كل جهاز لايت ميتير  

المصادر 

Exposureguide.com

Wikipedia

Digitalcameraworld

Digital-photography-school.com

Cambridgeincolour.com

لو شايف الدرس  مفيد شير مع صحابك وخلى الناس تستفيد  .. واشترك في الموقع عشان تتابع كل جديد 🙂

 

Comments

comments

%d bloggers like this: